香港快運跟劈，飛台中$684，週二前搶！
港龍呢個Weekend將台中劈到HK$700，香港快運緊係二仔底：死跟！由於母公司港航官網一向冇提供台中線網上訂購服務，想執佢平貨？去Zuji啦！齋飛HK$684，連稅HK$1,391，最後出發日期去到10/7，比港龍嘅30/6再遲啲，至啱學生哥放暑假玩餐飽！不過對於一般打工仔，爭十幾蚊你揀邊間？自己諗！呢隻筍盤最後出票日期為週二22/7，比港龍遲多兩日，但依家多咗競爭，相信呢口價會陸續有嚟，大家睇實啦。
（記得按下面「讚好」Share俾Facebook朋友）
華航突劈，2人同行飛台北高雄$665，週末23:00前搶
華航今日突然推出劈價盤，星期六先出，爭啲睇漏眼！去台北及高雄，需2人同行，齋飛每張HK$820，配合PayPal付款優惠HK$155後，再減至HK$665！台北去程限坐CI678（08:20/10:00），高雄去程限坐AE982（10:15/11:35），回程揀邊班都得。呢隻飛要喺官網訂購，最後出票日期為週末23:00（估計連埋週日晚卦），出發日期21/5 – 3/6，絕對係Last Minute到震！（記得留番登機證，以便申請台灣機票買3送1優惠）
（記得按下面「讚好」Share俾Facebook朋友）
卡塔爾歐洲線限時3天劈，暑假部份時間都得！
卡卡航空貴為歐洲平霸三寶之一（另外兩間當然係強國航空同羅宋湯航空），想執平貨當然唔好漏咗佢。今晚20:00開始，佢哋仲會劈出一批平盤，目的地包括柏林（連稅HK$6,928，下同）、布加勒斯特（HK$6,517）、布達佩斯（HK$6,533）、法蘭克福（HK$7,100）、倫敦（HK$7,755）、曼徹斯特（HK$7,485）、慕尼黑（HK$6,985）、索非亞（HK$6,423）、斯圖加特（HK$6,913）、薩格勒布（HK$6,463）， 平咗近二千幾三千，尤其係佢適用日期包括暑假頭尾兩段（中間14/7 – 15/8不適用），都盡量做到暑假有平飛（不過相信暑假唔會日日有呢口價，會稍為調高一啲）。出發日期最遲去到30/11，最後出票日期為本週日（20/5）23:59，今晚同Friend食飯，不妨夾下暑假齊齊去歐洲啦！
留意位：
1. 訂票日期：18/5 20:00 – 20/5 23:59
2. 出發日期：19/5 – 13/7、16/8 – 30/8、17/9 – 30/11
3. 機票有效期：3-30日
網址：http://www.qatarairways.com
（記得按下面「讚好」Share俾Facebook朋友）
AirAsia週五優惠，曼谷連稅飛香港$672，吉隆坡飛澳門$473
AirAsia每逢週五都會推出”Fabulous Fly-day”優惠，將Last Minute出發嘅機票限時劈出。我哋「又飛啦！」都曾經介紹過下，不過見佢好耐都冇飛香港／澳門優惠，所以先無提。點知今個禮拜嘅Fabulous Fly-day竟然見到香港／澳門優惠！1/6 – 30/6出發，曼谷飛香港單程連稅HK$672（THB 2,690），依家官網平均賣緊HK$1,125（THB4,500），回程平五舊！吉隆坡單程飛澳門連稅HK$473，依家官網就賣緊HK$648 – 798（MYR 259 – 319），都平二百幾。不過去程究竟有冇得平？估計就冇，不如一陣11am上官網望一望，放心！人流一定比開倉少得多，可以慢慢揀，不過記住截止時間為同日4pm，睇啱就爽手喇！
（記得按下面「讚好」Share俾Facebook朋友）
港航飛上海浦東入虹橋出，早去晚返$899
港龍你劈？港航梗係還手！呢幾日都講過唔少Open Jaw缺口飛筍盤，今次就介紹上海：其實係同城市，只係來回經唔同機場起飛。港航有一隻去程飛浦東，回程經虹橋機場嘅超筍盤，2人同行每張只需HK$899（連稅HK$1,667），唔單止價錢筍（東航都唔夠佢平，春秋係仲平，不過佢係廉航冇得比），最筍係早去晚返！去程搭早機HX236 08:20/10:45，回程夜機HX239 19:00/21:40，虹橋近市中心，最後嗰日大可玩到盡先出機場。官網冇得訂，聽早Call Sun Travel 新哥幫手出飛啦！
留意位：
1. 機票有效期：3-5日
2. 最少2人同行
3. 出發日期：01/06-30/06
4. 訂位後1日內付款及出票
查詢電話：2388 4003
（記得按下面「讚好」Share俾Facebook朋友）
港龍限時劈，桂林台中$700，清邁西安$1,300，濟洲$2,100
有部份「又飛啦！」Fans都知道尋晚零晨開始港龍推出限時3日劈價盤，不過亦有唔少Fans早訓覺，咁我哋不厭其煩同大家講多一次。由依家到本週六（19/5）23:59前，訂桂林或台中就HK$700（未連稅，下同），台中之前做$1,250，依家平近半！仲平過港航／華信喎！可惜台中優惠出發日期只去到30/6，不過桂林到31/8，即係暑假都飛得。清邁或西安就HK$1,300，清邁出發日期包晒整個暑假（1/7 – 29/8），有冇抵成咁呀！重點推介！西安當然筍，不過有幾多人去呢？至於濟洲HK$2,100，表面上價錢一般（淡季2人同行每位只係HK$1,589），但暑假飛韓國不嬲唔平，而且呢次可以1人成行，都諗得過！所有機票有效日期為2-7日。由於出發期限度度唔同，詳請請去番官網睇睇。
（記得按下面「讚好」Share俾Facebook朋友）
去晒布吉曼谷，國泰只係$2,230
一連兩晚同大家介紹港龍／國泰缺口飛（Open Jaw）筍盤，今次輪到泰國！依家淡季國泰來回曼谷做緊特價HK$1,950（未連稅，下同），而同系嘅港龍，布吉來回最平係HK$2,520。蝦！如果布吉入／曼谷出，又或者曼谷入／布吉出，機票只係HK$2,230！港龍布吉機票不嬲唔平（因為航班時間唔錯，早機去呀，唔似AirAsia要夜機），咁樣改一改，既可平幾舊，又可以玩晒兩地唔駛走回頭路，正喎！出發日期同馬來西亞一樣，去到12/7為止。
（記得按下面「讚好」Share俾Facebook朋友）
港航快運Last Minute飛北京$1,200
又有Last Minute勁平機票劈出嚟！今次係港航北京線。不嬲都話北京線好少減，港航今次突然將8/6前出發嘅北京機票狠劈到HK$1,200（港航同香港快運一樣），連稅HK$1,971，單人飛都得，優惠去到17/5止。今日已經係16/5，即係話得半個月多啲時間去飛，Check過系統，嚟緊幾個Weekend都仲有呢隻平飛賣，去程最早可以揀07:55，回程最夜可揀19:00，請星期五一日就可以玩足3日2夜。唔想請假又得！星期五有一班香港快運UO304 20:15離港，同樣做HK$1,200，放工出機場！邊度訂？官網冇，去真旅網啦！
（記得按下面「讚好」Share俾Facebook朋友）
玩齊吉隆坡同檳城，國泰只需$1,650
尋晚先介紹港龍台灣缺口飛（Open Jaw，即不同城市來回香港）抵玩，今次就介紹同系嘅國泰特價缺口飛。佢隻吉隆坡同檳城來回HK$1,600（未連稅，下同）筍盤都做咗一段長時間，不過原來佢Open Jaw飛都一樣好抵，無論揀檳城入／吉隆坡出，抑或吉隆坡入／檳城出，呢隻7日飛只需HK$1,650，中間你夾隻AirAsia內陸機，或者索性搭5粒鐘巴士就掂啦！當然你可以去AirAsia買兩張獨立單程飛自制Open Jaw，但依家先訂，冇筍嘢喎！況且國泰質素點都高幾皮，兼且出發日期去到12/7（最後訂購日期為30/6），暑假初想平飛馬來西亞？國泰For Sure！
（記得按下面「讚好」Share俾Facebook朋友）
AirAsia公佈國際線開倉價，香港出發唔算超筍
AirAsia終於一次過公佈明年春天國際航線嘅價錢，今晚凌晨（16/5）00:00開倉。不過單睇香港出發嘅主要航線，似乎唔係太抵喎（以超早餐盤而言）！除非大時大節都仲有呢啲價啦！香港飛吉隆坡/檳城/沙巴單程連稅HK$498起（來回連稅HK$876起），沙巴都算抵。飛曼谷單程連稅HK$498起（來回連稅HK$1,025起），曼谷大把平機票啦！飛布吉單程連稅HK$538起（來回連稅HK$1,065起），平時早兩三個月訂淡季都只係貴四/五舊，唔駛咁早決定喎！飛墨爾本/黃金海岸/珀斯（經吉隆坡轉AirAsia X） 單程連稅HK$1,422起（來回連稅HK$3,452起），同東航差唔幾，咁我寧願搭Full Carrier。不過澳門出發就堅平，飛曼谷/清邁單程連稅澳門幣288起（來回連稅澳門幣669起），想去清邁就抵啦！吉隆坡單程連稅澳門幣438起（來回連稅澳門幣827起），而飛墨爾本/珀斯（經吉隆坡轉AirAsia X）單程連稅澳門幣1,389起（來回連稅澳門幣3,481起），好過去香港轉機，都諗得過。不過其他東南亞跨國機票就非常有睇頭，詳情可以去AirAsia望一望。
留意位：
1. 訂購日期：16/5 – 20/5
2. 出發日期：4/1/2013 – 22/5/2013
網址：http://www.airasia.com/my/en/promotion/rr1280105b.page（所有航線）
http://www.airasia.com/hk/zh/promotion/rr1280105.page（只限香港出發）
（記得按下面「讚好」Share俾Facebook朋友）
