想儲里數又唔知點入門？Asia Miles亞洲萬里通絕對係香港最受歡迎嘅里數選擇，今次會由零同大家講解Asia Miles可以點樣賺取同埋點兌換機票，想輕輕鬆鬆換機票坐Business或者First嘅話就一定唔好錯過！
申請Asia Miles帳號
想賺里數之前，首先一定要申請番個Asia Miles帳號，申請方法好簡單：
步驟1.下載Asia Miles App或到Asia Miles官網後按登記成為國泰會員，並且輸入電話號碼。如果未夠 18 歲可以用監護人嘅手提電話號碼登記。
步驟2.輸入個人資料，包括個人姓名同埋出生日期，電郵。
步驟3.設定通訊偏好，如果有推廣或者資訊發佈時可以收到。
步驟4.設立個人密碼後認證手提電話號碼，認證完成後即完成！
賺取Asia Miles方法
1.信用卡兌換(💡最主流儲得最快)
現時香港有大量信用卡都可以用積分換Asia Miles，當中主流嘅包括：
- 渣打國泰Mastercard (本地HK$6/里，海外、食肆、網上購物HK$4/里)
- AE白金卡 (本地HK$9/里，海外低至HK$2/里)
- AE Explorer (本地HK$6/里，海外低至HK$1.68/里)
- HSBC EveryMile (本地海外HK$5/里)
- HSBC Red (網購HK$4/里)
- HSBC Visa Signature (指定「最紅自主獎賞」類別HK$2.78/里 )
- DBS Black Mastercard (本地HK$6/里，海外低至HK$2/里)
💡以上除咗渣打國泰Mastercard之外，全部都係手動轉里數嘅卡，手動轉嘅卡可以自己揀咩時候，所以喺有轉積分Promotion嘅時候就可以一次過換賺大量，從而賺取額外里數，而自動轉嘅渣打國泰Mastercard就只有有簽就自動入賬，可以唔洗驚里數過期。
另外除咗日常簽賬之外，最快賺里數嘅方法就係食唔同信用卡嘅迎新！因此想賺大額里數嘅話，建議不停食唔同信用卡嘅迎新，唔怕麻煩嘅話用夠一年Cut卡過冷河再申請再賺迎新！
2.搭乘國泰或夥伴航空公司
只需喺指定航空公司訂票或辦理登機手續時，填寫Asia Miles 會員號碼，即可根據航班艙位自動累積里數。當中航空公司包括國泰、日航、卡塔爾、英航、澳航等等One World成員嘅航班。另外除咗One World成員之外亦都有唔同嘅夥伴航空公司可以儲到，包括Air New Zealand、中國國際航空、Bangkok Airways、Swiss International Air Lines等等，詳細列表可以按此。
另外Asia Miles 並非固定按金額，而係取決於以下因素：
- ✈️ 飛行距離
- 🎟️ 艙等（Economy / Business / First）
- 💺 艙位（Booking Class，例如 O / Q / J 等）
因此即使搭以上嘅航空公司，都要視乎艙位去決定可以賺到幾多里數，某啲較平嘅艙位(主要係促銷)係有機會賺唔到Asia Miles，買票前記得留意番。
3.酒店積分轉換
酒店積分換Asia Miles基本上全部都可以話係唔抵換，但真係急需Asia Miles或者有兌換Promotion嘅時候仍然可以考慮。
| 酒店積分 | 轉換比例 |
|
Marriott Bonvoy |
3分 = 1里 🎁 另外每轉 60,000 分 → 送 5,000 里（即 25,000 miles） |
| Hilton Honors | 1o分 = 1里 |
|
World of Hyatt |
2.5分 = 1里 |
|
IHG One Rewards |
5分 = 1里 |
|
Shangri-La Circle |
1分 = 1里 |
酒店分永遠都係優先換免費住宿，換Asia Miles前諗清楚，而以下係各大酒店嘅積分等值。
- Marriott Bonvoy 約 HKD 0.5 – 0.7 / 分
- Hilton Honors 約 HKD 0.3 – 0.4 / 分
- World of Hyatt 約 HKD 1.2 – 1.5 / 分
- IHG One Rewards 約 HKD 0.3 – 0.5 / 分
- Shangri-La Circle 約 HKD 0.8 – 1.2 / 分
而抵唔抵係睇里數價值vs酒店分價值
👉 如果： 里數價值 > 酒店分價值 → ✔ 可以轉
里數價值 < 酒店分價值 → ❌ 唔好轉
4.日常消費
只要善用日常消費平台，同樣可以穩定累積 Asia Miles，將每一筆開支轉化為飛行里數。當中包括
🍽️ 餐飲消費（OpenRice）
平時約朋友食飯，其實已經可以開始儲里數。
只要透過 OpenRice 訂位，或者於指定合作餐廳用餐，再綁定你的 Asia Miles 帳戶，完成消費後就可以自動賺取15里。
最大優勢係覆蓋大量香港餐廳，無論日常食飯、約會定聚餐，都可以順便儲 miles，完全無需額外成本。
🛒 購物（國泰購物平台）
如果你平時有網購習慣，可以直接用國泰購物平台。
作為官方平台，每一筆消費都可以穩定賺取 Asia Miles，而且不時會有加乘活動，例如雙倍里數或限時優惠，用得好回報其實唔差。
⛽ 加油（Shell）
如果你有揸車，Shell亦係一個長期穩定累積里數的方法。
只要綁定會員帳戶或者使用指定信用卡，加油開支就可以按比例轉換為 Asia Miles。由於加油屬於固定開支，長期累積效果其實相當可觀。
🏨 旅遊相關消費
包括酒店預訂、租車、甚至旅遊保險，只要透過指定合作平台進行，都可以累積 Asia Miles。
如果你本身已經有旅行開支，呢部分其實係「順便賺」，唔拎就等於白白浪費。
5.指定銀行保險/定期
除咗飛行同日常消費，其實透過銀行理財產品，例如定期存款或保險計劃，同樣可以累積 Asia Miles，而且金額往往較大，屬於「高額入里」方式之一。
部分銀行會推出推廣活動，只要開立指定金額的定期存款（Time Deposit），即可獲得 Asia Miles 作為回贈。
另外透過指定銀行或保險公司購買人壽保險／儲蓄型保險，有時亦會附送 Asia Miles 做迎新獎賞。
6.易賞錢
只需將易賞錢帳戶連結至國泰會員帳戶，即可於 App 內進行轉換。
- 1,500 易賞錢 = 300 Asia Miles
（即約 5 : 1）
平時去百佳、屈臣氏、豐澤等可以賺易賞錢嘅鋪頭消費，所賺嘅易賞錢都可以間接轉成里數！
除此之外Asia Miles仲有數之不盡嘅賺取方法，想知道更多可以到官網查閱。
使用Asia Miles里數
1.Asia Miles兌換機票所需里數
要數到Asia Miles最大價值嘅話，一定係換機票！以下表格係用Asia Miles兌換國泰航班所需嘅單程里數（資料至2026年4月）。
| 類別 | 航點範例 | 經濟艙 (Econ) | 特選經濟 (PEY) | 商務艙 (Business) | 頭等艙 (First) |
| 超短途 (1-750哩) |
台北、馬尼拉、廣州、河內、高雄、廈門 | 7,000 | 11,000 | 16,000 | – |
| 短途 – 類別 1 (751-2,750哩) |
曼谷、首爾、胡志明市、新加坡、上海 | 10,000 |
18,000 |
27,000 |
43,000 |
| 短途 – 類別 2 (751-2,750哩) |
日本，印度、印尼、尼泊爾 | 12,500 | 23,000 | 32,000 | 50,000 |
| 中途 (2,751-5,000哩) |
杜拜、悉尼、孟買、馬爾代夫 | 20,000 | 38,000 |
60,000 |
90,000 |
| 長途 (5,001-7,500哩) |
倫敦、洛杉磯、巴黎、溫哥華、巴塞隆納、哥本哈根 | 27,000 | 50,000 |
91,000 |
125,000 |
| 超長途 (7,501+哩) |
紐約、多倫多、芝加哥 | 38,000 | 75,000 |
119,000 |
160,000 |
想用Asia Miles達到最高性價比嘅玩法，一定係儲夠里數換Business或者First！事關經濟客位容易搵到平機票，商務及頭等比較難有，除非你超Last Minute / 旺季買唔到平經濟位，又咁啱見到有經濟位兌換，咁都尚算值得。另外超短途嘅台北亦都建議直接買好過換，畢竟本身台北航程太短，機票一向唔貴。
過往可以同Asia Miles一較高下嘅Avios，喺改制下已經相對變得性價比無咁高，如果係住喺香港嘅話，首選儲里數基本上一定係揀Asia Miles。
除此以外，如果係以下情況嘅話，都推薦用Asia Miles換：
- 只需單程票嘅時候
因為大多數航點現金直接買單程嘅票價，大約係來回嘅60%-90%價格，所以只要單程嘅狀況下都推薦用里數換。
- Last minutes買飛
由於Last Minutes嘅機票價格會大幅上漲，因此用里數換嘅話里數價值亦都會大幅上升。
💰 每 1 Asia Mile 值幾多錢？
如果兌換長途商務或者頭話，每一里價值可以去到約 HK$0.30以上！想客觀地睇張票抵唔抵換，可以將每里價值 =（ 機票現金價 − 稅項）÷ 所需里數，如果每里高於HK$0.25嘅話就算係非常抵！
另外Asia Miles亦都可以以里數＋現金方式兌換國泰機票。同樣用番每里價值 =（機票現金價 − 你付嘅現金）÷ 使用里數呢條公式，基本上價值低過HK$0.15/里嘅都建議換。
2.國泰購物平台兌換商品
國泰購物平台唔單止可以用現金購物賺里數，亦都可以用里數換商品，當中包括耳機、iPhone、Dyson、行李箱、生活用品等等。然而里數價值只係大約 $0.02 – 0.05 / 里，因此除非有太多里數用唔晒，否則都唔建議用里數做兌換。
3.酒店住宿
Asia Miles 亦可以用嚟預訂酒店住宿，涵蓋由商務酒店到高端酒店嘅選擇。相比直接用現金預訂，呢種方式可以節省現金開支，但整體回報通常屬於中等水平，大約 HKD 0.05–0.10 / 里。
4.租車服務
兌換租車服務勝在靈活，特別係去歐洲、日本等需要自駕嘅地方，可以減少現金支出。不過整體里數價值大約只有 HKD 0.05 / 里 左右，屬於一般水平，因此較適合作為輔助用途，而唔係主要兌換目標。
5.餐飲及體驗
Asia Miles 提供多種餐飲禮遇同生活體驗，包括高級餐廳、品酒活動甚至特色體驗行程。呢類兌換最大吸引力係「體驗價值」，適合用嚟慶祝或者享受生活。不過以純價值計算，通常只有 HKD 0.05–0.10 / 里，未算特別高。
6.機票升級
如果本身已經買咗機票，而當中又係可以使用 Asia Miles 升級嘅指定艙位嘅話，就可以申請機票升級，例如由 Economy 升級至 Business。
相比直接兌換機票，由於本身已經用現金買咗飛，所以升級所需里數通常較少，但就可以大幅提升飛行體驗，享用到更寬敞嘅座位、餐飲同埋貴賓室服務。整體價值大約可達 HKD 0.15–0.25 / mile，屬於直接兌換機票以外最值得嘅用法之一。
兌換機票教學 – 網頁版
到https://www.cathaypacific.com/cx/zh_HK.html 登入國泰Asia Miles帳號後，點選預訂航班，然後輸入出發地點，目的地，旅程類別，客艙級別及乘客數量，仲有出發日期之後，勾選右上角嘅使用里數預訂就可以開始兌換並且查看有冇可以兌換嘅機位。
入到去之後揀自己想要嘅航班，另外如果當日無想要換嘅航班嘅話，亦可以更改日期或艙等再查有冇位。
揀完航班如果無問題就可以比錢出票！
除咗自己上網換之外，你亦都可以用WhatsApp 客服 +852 2747 2747 、打電話去+852 2747 3838或者即時線上客服去換機票，特別喺海外有時要收SMS先登入到Asia Miles嘅時候，或者想兌換one world環球票嘅話，就可以用以上嘅其他方法去兌換～
💡WhatsApp聯絡客戶服務團隊秘技：
由於用WhatsApp聯絡一開始會係AI對應，想要快速搵真人客服幫手，只要輸入「聯絡客戶服務團隊」，並且輸入會員號碼，就會自動幫你連接到真人客服！
Asia Miles 更改機票的方法
更改用 Asia Miles 兌換的機票，一般可以透過以下幾種方式辦理，基本上同當初出票時嘅聯絡渠道相同：
- 電話客服：致電 Asia Miles 客戶服務熱線 +852 2747 3838
- 網上自助系統：登入 Asia Miles / Cathay Membership 帳戶，在「我的預訂」中自行修改
- 即時線上客服 (Live Chat)：透過官方網站與客服人員即時對話處理
- WhatsApp 客服：傳訊至 +852 2747 2747
更改機票收費表
| 處理項目 | 網上自助系統 | 電話 / Live Chat / WhatsApp |
| 更改訂位 (每次) | US$50 / 7,500 里 |
US$50 / 7,500 里 人工改需額外支付服務費US$40或扣除6000里數 |
| 重新出票 (每次) | – | US$50 / 7,500 里 |
| 取消訂位 (每次) | US$120 / 17,000 里 | US$120 / 17,000 里 |
用 Asia Miles 換嘅機票，即使No show咗係仍然可以改期，而且比現金票更有彈性。如果你當日冇搭到班機，一般唔會收 no show 罰款。而如果你想改票，只要付相關費用，並且附合以下兩個條件，就可以申請。
- 📅 機票仍在有效期內（出票起一年）
- 💺 新日期有里數機位
將親友加入Asia Miles兌換名單
首先登入按「我的帳號」嘅「更新資料」。
選擇「同行旅伴及兌換名單」後按「新增你的同行旅伴」
輸入相關資料後提供就完成，咁就可以幫親友換機票～
注意番每個Asia Miles會籍只可以免費設定5位成員至兌換名單，另外網上更改名單每次改動一個名額都需要收費US$50，其他途徑嘅話要US$75，每年度上限可以改動3次。
Asia Miles 有效期
- 有效期： 18個月。
- 里數續命大法： 只要 18 個月內有過 1 次變動（無論係儲分定換分），全部里數就會自動延期 18 個月。
💡 專業玩家建議 (Pro-Tips)：
- 「續分」首選： 如果你只係想幫里數續期 18 個月，最簡單係去 OpenRice 訂個位食飯（賺 25 里）、信用卡轉分或者酒店轉少少分過嚟，成本接近零。
- 留意加贈活動： 國泰每年通常會有 1-2 次「銀行轉分加贈 10-15%」嘅活動，等嗰陣先轉分會抵好多。
- 定時清分：里數基本上只會貶值而唔會升值，所以唔建議囤積大量里數，適當時候就要換機票去個旅行。
- 抵換之選：單程機票／長途商務／長途頭等
- 提前換旺季：機位會喺出發前360日開放兌換，如果想換旺季，最好一開就換定！
