和歌山玩到夠晒，Aki同Jon Tsui轉攻三重縣（https://youtu.be/9kY-HhT6Ayc）！三重縣位處日本中部的近畿地區，由和歌山自駕嘅話，大約3個鐘車程就得。揸咗咁耐車，Aki同阿Jon就去大祭五臟廟，第一站就品嘗頂級松阪牛。
松阪牛呢個名，唔少人細細個就聽過啦！我哋成日講嘅松阪牛，就係指三重縣松阪市以及其近郊所生產嘅黒毛和牛，同神戶牛、近江牛並稱「日本三大和牛」。喺日本人心中，松阪牛更堪稱為最頂級嘅牛肉，所以嚟到三重，又點可以唔試地道松阪牛呀！
頂級松阪牛鐵板燒 TSU COUNTRY CLUB
Aki同Jon Tsui去咗一間位於哥爾夫球會裡面嘅高級餐廳，之所以咁出名，係因為呢度嘅松阪牛係由全縣最頂級嘅松阪牛專門店「朝日屋」供應。呢度嘅鐵板燒套餐每位 8,800円+ 稅，主菜包括燒松阪牛肉、鮑魚等矜貴美食，更配以前菜、燒野菜、餐湯、蜜瓜。利用鐵板燒過嘅松阪牛口感外脆內軟，肉汁豐富，而且入口即溶，配合埋特配嘅調味料（例如醬料、芥末），更可提升口感，一試難忘。
不過想食都唔係就咁行入去就食到！呢間餐廳嘅松阪牛鐵板燒套餐每日限量供應4席（午、晚市各供應2席，每席2人），大家記得記得最少提前3日預約。
【TSU COUNTRY CLUB】
地址：三重県津市片田長谷町30番地
電話：+81-120-80-3700
網址：http://tsu.co.jp/
志摩市安乘 野生河豚料理
河豚喺日本係高檔食材，而志摩市安乘河豚採用野生捕捉嘅方法，所以呢度生產嘅河豚，肉質特別結實且有彈性。Aki同Jon Tsui去到志摩市一間旅館餐廳享用河豚宴。菜式包括：河豚刺身、河豚火鍋、烤河豚、炸河豚，就連河豚睪丸都有得食，您又敢唔敢食呢？最後仲有河豚酒添呀！
三重縣美食滋味遊：頂級松阪牛 安乘野生河豚宴 超Sweet牛奶雪糕
【富久潮】
地址：三重県志摩市阿児町国府3675-1
電話：+81-599-47-3520
網址：http://isesima.net/fukushio/
食完咁多好西，介紹多間超正嘅雪糕店俾大家。呢間雪糕店有超多特色口味，例如：士多啤梨、藍莓、抹茶、伊勢茶、黑芝麻、咖啡、真珠鹽等等，而且雪糕成份有70%係牛奶，所以特別香滑可口。牛奶更係每日新鮮榨取，除咗Gelato雪糕，仲有其他牛奶製品都好正㗎。
【ミルクパレット】
地址：三重県津市一色町241-1
電話：+81-59-246-7521
網址：http://www.milk-palette.jp/
留言